119 ka mga indibidwal kag 33 ka mga pamilya ang nawad-an sa mga puluy-an sa besperas sang paskwa matapos mahitabo ang sunog sa Molo
![ILOILO CITY - Sa pihak sang masako nga adlaw sa besperas sang paskwa halos indi mag pati ang mga pumuluyo sang Zone 5 Barangay San Juan kag Zone 3 Juntado Subdivision Calumpang nga ang ila mga puluy-an ang gintupok sang kalayo alas-2:20 sang hapon, Sabado, Disyember 24, 2022.](https://radyobistado.com/wp-content/uploads/2022/12/fire.jpg)
ILOILO CITY – Sa pihak sang masako nga adlaw sa besperas sang paskwa halos indi mag pati ang mga pumuluyo sang Zone 5 Barangay San Juan kag Zone 3 Juntado Subdivision Calumpang nga ang ila mga puluy-an ang gintupok sang kalayo alas-2:20 sang hapon, Sabado, Disyember 24, 2022.
Imbes nga mag selebrar sang pagkabun-ag ni Jesu Cristo nga masinadyahon nabaylohan nalang sang pagkasubo kag dismayado. Ini ang sitwasyon sang mga nasunogan kag mga ginpakigbahin nila nga panaysayon, (naga lumaw-lumaw ang mga ni Jose Celis matapos ma ubos lamon sang kalayo ang ila puluy-an nga nahamtang malapit sa baybay. Istorya ni Celis ginkakibot nalang sini sang siya ang nag guha kag nakita sini ang naga ibwal nga kalayo sa likod sang iya puluy-an.
![Bureau of Fire Protection officers and volunteer units scour the area for their clearing operation after the big blaze. Photo by Aaron Lloyd Balala Refoyo](https://radyobistado.com/wp-content/uploads/2022/12/Bureau-of-Fire-Protection-officers-and-volunteer-units-scour-the-area-for-their-clearing-operation-after-the-big-blaze.-Photo-by-Aaron-Lloyd-Balala-Refoyo-1024x462.jpg)
Nag binuligay naman ang mga residente sang pagtapna sang kalayo apang wala gid makasustiner bangud sa mabaskog nga dapya sang hangin nga gikan sa baybayon nga amo ang rason sang madasig nga paglapta sang kalayo sa mga kaingod nga puluy-an.Pila diri ka mga nasunogan ang wala gid may na salbar nga mga kagamitan kaangay sang panapton, gamit sa sulod sang puluy-an, kag mga importante nga mga dokumento.
Ang mga nasunog nga puluy-an ang biktima man anay sang storm surge sa tion sang pagyasyas ni bagyong #PAENG. Ini naman ang gin ka dismaya sang pumuluyo nga naga siling “wala pa gani mag inano ang gin pa tukod namon nga balay bangud sa storm surge, ari naman kami gin lamon naman sang kalayo ang amon puluy-an, mas maayo nalang nga kawatan ka kaysa sa ma sunogan.”
![A fire volunteer talking to one of the residents who try to collect a metal pole that remains to be useful from the ashes of his house. Photo by Aaron Lloyd Balala Refoyo](https://radyobistado.com/wp-content/uploads/2022/12/A-fire-volunteer-talking-to-one-of-the-residents-who-try-to-collect-a-metal-pole-that-remains-to-be-useful-from-the-ashes-of-his-house.-Photo-by-Aaron-Lloyd-Balala-Refoyo-1024x462.jpg)
Matapos ang ma sobra isa-ka-oras nga paglamon sang kalayo gilayon man nag abot ang bulig gikan sa lokal nga gobyerno kaangay sang 1,550Kgs sang bugas; 970 cans sang sardinas; 531 cans sang Beef Loaf; 531 cans sang corned beef) kag non-food items (58 sleeping mat, 58 mosquito net and 29 Jerry cans, ini suno sa pahayag ni Mary Grace Centino ang District Head Social Welfare/ Officer 3 City Social Welfare and Development Office.
Sandig sa report ni Centino, 31 ka mga indibidwal nga may 7 ka mga pamilya ang apektado kag 5 ka mga puluy-an ang totally damage kag 2 diri ang partially damage sa Zone 5, Barangay San Juan. Sa Calumpang Zone 3 naman ang may 26 ka mga pamilya nga may 112 ka mga indibidwal ang apektado kag 18 diri ang totally gutted kag 1 ang partially.
![Residents unprepared during the fire incident dragged some of their household materials onto the shoreline as they watch their houses consumed by the blazing fire early this afternoon at Brgy. San Juan, Molo. Photo by Aaron Lloyd Balala Refoyo](https://radyobistado.com/wp-content/uploads/2022/12/Residents-unprepared-during-the-fire-incident-1024x576.jpg)
Ang pag-ibwal sang kalayo ang nag dangat pa sa ika-apat nga alarma. Samtang, na kontrol ang kalayo, alas-2:40 kag na fire-out naman, alas-3:07 sang hapon. Sa nakuha nga report sang Radyo Bistado sa lugar may yara sang may naga luto sa isa ka puluy-an nga na bayaan kag amo ang ginatudlo nga rason sang sunog.
Samtang, naga padayon pa ang imbestigasyon sang taga Bureau of Fire Protection sa balor sang halit sang kalayo kag ano ang gintunaan sang sunog. Naga pasalamat naman ang residente sa lugar nga wala sang ila mga himata ang napilasan sa nag luntad nga sunog.