Suspek nga nagtiro patay sa Australian National sa Banwa Ajuy, Iloilo ginpasakaan na sang kaso
ILOILO CITY – Napasakaan na sang kaso nga murder ang suspek nga nagtiro patay sa Australian National sadtong besperas sang paskwa alas 10:45 ang takna sang aga sa NHA Village Brgy. Tipacla, Ajuy, Iloilo, Desyembre 24, 2022.
Ang biktima ang ginkilala kay Andrew Priest, 63 anyos, kasado, isa ka Australian National samtang ang suspek naman ang ginkilala kay Fernando Gargar, 41 anyos, kasado, isa ka panday kag lunsay residente sang nasambit nga lugar.
Sa interview sang Radyo Bistado Kay PLt. Jojo Octavo, Ang Officer-in-Charge sang Ajuy MPS, ginsiling sini nga ginsugo sang asawa sang biktima ang suspek nga magbakal sang bugas apang nagreklamo ini nga mabaho ang bugas nga nabakal sini rason nga nagluntad ang pagbina-isay sa tunga sang awasa sang biktima kag sang suspek. Tungod sang pagka-impito gintayaan sang suspek ang asawa sang biktima gamit ang shot gun nga armas luthang apang ginsalo ini sang iya bana.
Tungod sini naka-angkon sang mga pilas sa dughan ang biktima rason nga ginhingagaw ini dala sa Sara District Hospital kag ginrefer sa Doctors Hospital sa syudad sang Iloilo apang ginbawi-an gid ini sang iya hulam nga kabuhi.
Sa karun ang suspek ang nakahunong na sa Ajuy MPS kag kahapon nga adlaw Desyembre 28, 2022 ginpasakaan na ini sang kaso nga murder.
