Lalaki nga mangkuryente sang isda sa sapa, nasapwan patay sa Barotac Viejo
![](https://radyobistado.com/wp-content/uploads/2022/12/LALAKI-na-kuryente.jpg)
ILOILO CITY – Naga hamyangon sa kilid sang sapa samtang karga ang electric fishing device sang masapwan nga wala na sang kabuhi ang lalaki, alas-8:30 sang aga sa Barangay Geronimo, Barotac Viejo, Iloilo.
Suno sa pahayag ni Police Major Ciriaco Esquilarga, hepe sang Barotac Viejo Municipal Police Station, sang nakipag-angut ant Radyo Bistado, ginkilala ang biktima kay Febren Andario, 32 anyos kag residente sang nasambit nga lugar.
![Photo courtesy of Barotac Viejo Municipal Police Station.](https://radyobistado.com/wp-content/uploads/2022/12/KURYENTE-rods-768x1024.jpg)
Ginhambal sini nga mismo si Barangay Captain Alberto Baldevarona ang nag pahibalo nga may yara sang nasapwan nga lawas sang lalaki nga malapit sa sapa kag may pilas sa agtang.
Basi sa imbestigasyon, kahapon sang Huwebes, Disyembre 12 sang nag halin sa ila puluy-an ang biktima nga mapadulong ini sa sapa agud mangkuryente sang isda para i-sud-an.
Sang nag-patak na ang kasisidmon ginkatingala sang pamilya sang biktima nga wala na ini makapuli sa ila balay kag aga nalang sang Disyembre 13, 2022 sang mahibalo-an sang pamilya nga nasapwan nalang sa higad sang sapa wala na sang kabuhi ang ila himata nga 500 metros ang kalayoun gikan sa ila puluy-an.
![Photo courtesy of Barotac Viejo Municipal Police Station.](https://radyobistado.com/wp-content/uploads/2022/12/body-of-the-victim-1024x768.jpg)
Ginsiling man ni Esquilarga nga posibli nga nakadalin-as ini kag nakuryente mismo ang iya kaugalingon. Nakita man nga may pilas sa agtang ang biktima tuga sang koul.
Ginhingagaw pa dala ang biktima sa Governor Niel D Tupas District Hospital apang gindeklara ini nga dead on arrival sang attending physician nga si Doktor Nestor Verdugo.
Wala pa sang pinal nga desisyon ang pamilya kon ipa-idalum nila sa autopsy examination ang lawas sang biktima.
Sa karon, yara naman ang lawas sini sa isa ka morgue sa banwa sang Barotac Viejo, Iloilo.