Covid 19 Vaccine Cards kinahanglanon kun mag sulod sa mga cementeryo sa November 1
ILOILO CITY – Sa Executive Order 260 nga gin pirmahan subong nga adlaw ni Iloilo Provincial Governor Arthur Defensor Jr. gina pahayag sini nga ang tanan nga cementeryo, memorial parks kag columbaria sa bug-os nga probinsya sang Iloilo ang mangin bukas sa ti-on sang Undas o kalag-kalag, apang ang tanan nga maga bisita, ang fully vaccinated, maga soksok sang face mask kag mag obserbar sang minimum health standards.
Suno sa gobernador nga ini basi sa gihapon sa Inter Agency Task Force ( IATF ) on covid 19 guidelines alert level 1 status sa diin ang probinsya sang Iloilo ang napaidalom tobtob October 31, 2022.
Gin mandoan man sang gobernador ang tanan nga Covid 19 Local Task Forces sa pag patigayon sang monitoring agod mapasiguro ang pag implementar sang vaccination protocol.
Kalakip sa acceptable proof of vaccination ang mga masunod.
- World Health Organization International Certificate of Vaccination & Prophylaxis
- VaxCertPH
- National or State Digital Certificate
- Vaccination Card
- Other Proof of Vaccination permitted by the IATF.
Suno pa kay Defensor apisar nga ang covid 19 virus ang indi na severe apang naga pabilin nga transmissible.
Samtang si Iloilo City Mayor Jerry Treñas nag pa gwa sang Executive Order (EO) 085 nga may titulo “AN ORDER PROVIDING FOR GUIDELINES ON THE OBSERVANCE OF THE 2022 ALL SAINTS’ AND SOULS’ DAY CELEBRATION & REGULATING ACTIVITIES THERETO.”
Basi sa amo nga executive order gina dumilian ang tanan nga unvaccinated kag partially vaccinated individual sang suidad sang Iloilo nga maka sulod sa cementeryo sa November 1.
Kalakip man sa nasambit nga EO ang pag dumili sa pag dala sa sulod sang cementeryo ang mga masunod:
- Any type of vehicle
- Liquors and/or alcoholic beverages
- Flammable materials
- Firearms & any sharp objects
- Videoke or any sound system that may cause loud noise
- Deck of cards, bingo cards or any gambling activities
- Overnight staying
Samtang gin pahayag ni Defensor kag Treñas nga sarang man maka bisita sa cementeryo ang mga unvaccinated sa iban nga adlaw.
