Archdiocese of Jaro nakahanda na sa pagsugod sang Misa Aguinaldo bwas nga adlaw, Desyembre 16 tubtob 24

ILOILO CITY – Preparado na ang bug–os nga simbahan katoliko sa idalum sang Archdiocese of Jaro sa pagsugod sang traditional nga pagselebrar sang Aguinaldo masses ukon Simbang gabi nga magsugod bwas nga adlaw Desyembre 16 tubtob 24, syam ka adlaw nga pagpulaw kag pagbugtaw sa kaagahon bilang pagsakripisyo sa pagpa-abot sang pagkatawo sang mahal nga Ginuong Jesucristo.

Madumdoman nga istrikto ang pagtigayon sang aguinaldo masses sa sulod sang duha katuig sang nakaligad nga mga tinuig bangud sang hugot nga mga protocols nga ginpatigayon bangud sang Covid-19 pandemic nga nag-igo sa bug–os nga kalibutan rason sang pagkasuspendi kag pagpauntat sang mga tradisyon sang simbahan sa matawo nga pama-agi.

Sa karun bangud sang pagbalik na sa normal nga pang-ginawi balik naman ang daan nga mga buluhaton ilabi nagid ining simbang gabi nga ginahiwat tagsa nga mag-abot ang bulan sang Desyembre.

Sa interview sang Radyo BISTADO kay Rev. Fr. Angelo Colada ang chairman sang Archdiocesan Commission on Social Communication, ginalauman nga magadugok ang mga tumuluo nga magapadulong sa simbahan agud magsimba subong nga tuig kag hindi malikawan nga mag-gilinutok sa sulod sang simbahan.

Ginpanugyan sini nga padayunon sa gihapon ang mga protocols nga amo ang pagdala sang mga alcohol ukon sanitizer, pagsuksok sang facemask kag kun nagabatyag na sang trangkaso kag sa mga comorbidity ginsiling sini nga mas maayo nalang nga magpabilin sa mga tagsa ka mga puluy-an kag maglantaw nalang sa mga online masses nga ginapatigayon sang simbahan kag para sa mga dalagku nga mga Parokya agud malikawan ang pagginutok may yara man sang mga pagahiwaton nga mga misa sa iban nga mga barangay

Dugang pa ni Fr. Colada, nga ini isa ka manami nga prebilihiyo nga ginhatag sang simbahan agud nga makasaulog sang Misa de Gallo bilang preparasyon sa pagkatawo sang mahal nga manunubos. Suno sa iya isa ini ka maayo nga tradisyon ukon kustombre nga gindala sang mga Español sa Pilipinas.

Sa katapusan ginpanugyan sini sa mga tumuluo nga kun magsimba dapat matuod-tuod gid ang intensyon sa pagsimba. Ini isa ka pama-agi agud mahatagan man suno sa iya sang igtalupangod kag mapamalandungan ang aton Espirituhanon nga kabuhi.