MGA LINEMAN SANG MORE POWER LIWAT NAGPAIDALUM SA TRAINING AGUD MAHANAS ANG ILA ABILIDAD SA LIVE WORKS

Balik sa training ang mga lineman sang MORE Power subong nga Hunyo.

Ila liwat nga gintun-an ang mga safety protocol kag standard operating procedure sa pag responde sa nanari-sari nga mga lineworks.

Matapos ang seminar, insegida derecho sa field training ang mga lineman sa diin aktwal nila nga ginkaayo ang linya nga may nanari-sari nga senaryo.

Sa sini nga higayon, live works ang ila gintrabaho. Nagakahulugan, wala sang ginpatigayon nga brownout samtang ila ginakaayo ang mga linya.

Tuman ka delikado, gani ini karon ang kaundan sang ila training.

“Basically ining training nga live works training, daku ini nag bulig indi sa amon sa mga supervisors but at the same time sa lineman man para ma perform natun sang mayo ang ubra when it comes nga ara na kita sa field. At the same time, mabal-an naton ang hazards kag ang procedure nga gina ubra naton sa area especially kung mag ubra na sang live works,” pahayag ni Engr. John Paul Balsomo, Chief Operations Specialist, Networks Operations Department sang MORE Power.

Libre ang training gani tuman ang pagpasalamat sang mga lineman bangud sarang nila ma ubra ang mga live works nga wala sang kulba.

“Nagapasalamat ako sa MORE Power kay gintraining ya kami sa liveworks kag daku gid in inga mabulig sa amon nga madugangan amon knowledge ilabi na gid sa konsumidor nga pwede gali namon maubra nga wala sing brownout. Para nga magdugang pa gid amon knowledge kag maka training kami para ma perfect namon amon nga ubra,” pahayag ni Rodelio Dapatnapu Jr. Metering Services Lineman.

Naglawig sang lima ka adlaw ang training nga may nanari-sari nga senaryo, sa diin dapat ma ideyahan sang mga lineman kag supervisor ang pag kaayo, gamit ang ila natun-an.

“When it comes sa in inga training, mapadasig gid ang atun response say for example may mag troubles nga kinahanglan gid sang tawo, maka padala kita sang response team nga maka perform live works sa area,” dugang pa ni Engr. Balsomo.

Kada tuig, nagapatigayon sang training ang MORE Power sa mga lineman kag supervisor, pati man sa mga third party contractor agud padayon sila nga mangin maalam sa mga delikado nga senaryo kada adlaw.

Sang Hunyo 2022, nalab-ot sang MORE Power ang 1 million safe man hours ini sa pihak sang madamu nga mga repairs kag upgrading sa franchise area.