Lechon Baboy gin dumilian nga maka sulod sa banwa sang San Joaquin, Iloilo
![ILOILO CITY - Sa Executive Order (EO) 29 series of 2022 nga gin pirmahan ni San Joaquin Mayor Ninfa Garin ang naga pahayag nga ang bug-os nga banwa sini ang gin paidalom sa Alert Level kag maga patuman sang pamaagi agod matapna ang pag lapta sang African Swine Fever (ASF) virus.](https://radyobistado.com/wp-content/uploads/2022/10/lechon-baboy.jpg)
ILOILO CITY – Sa Executive Order (EO) 29 series of 2022 nga gin pirmahan ni San Joaquin Mayor Ninfa Garin ang naga pahayag nga ang bug-os nga banwa sini ang gin paidalom sa Alert Level kag maga patuman sang pamaagi agod matapna ang pag lapta sang African Swine Fever (ASF) virus.
Ang ini nga lihok ang gin patigayon agod mahatagan sang protection ang mga residenti nga naga sagod sang baboy kag malikawan ang pag laton sang balatian sa bug-os nga banwa.
Sa nasambit nga EO, Isa sa pamaagi agod malikawan ang pag lapta sang ASF amo ang pag dumili sang pag sulod sang mga baboy sa banwa sang San Joaquin. Kalakip sa gina dumilian ang inihaw nga baboy, froozen goods, luto nga karne sang baboy ilabi na ang lechon.
Gin mando man sa amo nga EO ang pag tukod sang Task Force ASF San Joaquin nga maga panguna sa pag patigayon sang surveillance operation, pag imbentaryo sang tanan nga piggery kag pag conduct sang boarder control point.
Gin hingyo ni Garin ang bug-os nga pumoloyo sang San Joaquin nga mag bakal sang karne sang baboy sa ila lamang nga banwa.
Samtang gin paidalom naman sa state of calamity ang Banwa sang Oton pinaagi sa Resolution nga gin pasar sang Municipal Disaster Risk Reduction & Management Council (MDRMMC) nga gin aprobahan unanimously sang Sanguniang Bayan members sini.
Suno sa kay Oton vice mayor Neil Olivares kapin 5.6 milyones pesos nga emergency fund ang gin tigana agod paga gamiton sang local government unit sang Oton.
Suno pa kay Olivares nga sa 37 ka barangay sang Oton 9 ang kumpirmado nga apektado sang ASF.
Ang mga barangay amo ang masunod;
- Bita Norte
- Bita Sur
- Cabolo-an Norte
- Cabolo-an Sur
- Abilay Norte
- Sta. Monica
- Galang
- Buray
- Tagbak Norte
Samtang gin pahayag naman ni Iloilo Governor Arthur Defensor Jr. sa gin patigayon nga press conference kahapon nga adlaw nga iya paga sapulon subong October 21, 2022 ang mga alkalde sang kabanwahan nga na classify sa pink (buffer) zone.
Kaupod ang provincial disaster cluster plano sang gobernador nga istoryahan ang mga preventive measures batok sa ASF sa ila mga doog nga nasakupan.
Matandaan nga ang mga banwa sang Tigbauan,Pavia, San Miguel kag Iloilo city ang gin classify sa idalom sang Pink zone okon lugar nga kaiping sang Red (infected) zone sang ASF.