Apat ka mga salakyan ginpangluthang sa City Proper
![ILOILO CITY — Walo ka lupok nga gikan sa armas luthang ang nag papu-ag sang atensyon sa oras sang inug tulog sang mga pumuluyo sang Barangay Monica Bluementritt, City Proper.](https://radyobistado.com/wp-content/uploads/2022/12/windshield-hit-1.jpg)
ILOILO CITY — Walo ka lupok nga gikan sa armas luthang ang nag papu-ag sang atensyon sa oras sang inug tulog sang mga pumuluyo sang Barangay Monica Bluementritt, City Proper.
Ini ang nag-luntad alas-11:00 sang gab-i sa diin kakulba ang nag-dangup sa mga residente sa lugar bangud sa asud-asud nga lupok.
Na igo diri ang apat ka mga salakyan nga naga parking sa sulod sang covered gym sang nasambit nga barangay.
Ang duag puti nga salakyan ang may igo sang bala ang bintana sini nga na hamtang sa tou nga porsyon nga nag-tuga sang dako nga buho, igo sa kilid sang nawala kag tou nga porsyon sang bintana lakip na ang duha ka igo sa tou nga porsyon sa unhan nga pwertahan ang na angkon sang duag pula nga salakyan, samtang, ang duag itom nakaangkon sang tatlo ka igo sang bala sa nawala nga porsyon sang pwertahan kag ang puti nga salakyan nga ingod sang itom ang nadapyasan sang bala ang atop sini.
![Photo by Aaron Lloyd Refoyo.](https://radyobistado.com/wp-content/uploads/2022/12/bullet-hit-1024x768.jpg)
Ang duha ka duag puti nga salakyan ang ginapag-iyahan ni Fillmore Espinosa, ang itom naman ang kay Ma. Monica Espinosa kag ang pula amo kay Lovely Obligasyon.
Ginsiling naman ni Punong Barangay Antonio Espinosa nga sya ang na murag-muragan sa mahumook sini nga tulog bangud sa mabaskog nga lupok sang armas luthang. Nag kamang pa padulong sa lugar si Espinosa bangud na bati-an gid sini mismo ang linupok sang pusil, sang nag-tahaw na, nagtambad sa iya ang mga salakyan nga may igo na sang bala kag wala na ma abtan pa ang nag-buhat sang krimen.
![Photo by Aaron Lloyd Refoyo.](https://radyobistado.com/wp-content/uploads/2022/12/black-car-hit-1024x768.jpg)
Panugyan naman ni Espinosa sa nag-buhat sini, ”Surrender kana kon ikaw nag-himo, ngaa salakyan gintiro mo, ginpu-ag mo diri ang kataohan sa barangay kon sin-o kaman.”
Yara man sa lugar ang presensya sang City Director Police Colonel Leo Batiles nga nag-bulig man imbestigar kasubong man ang hepe sang Iloilo City Police Station 1 nga si Police Major Shiela Mae Sangrines.
Ma swerte naman ang mga pumuluyo sa lugar nga wala sang may nahulamid ukun napilasan.
Sa karon, padayon pa ang imbestigasyon sang kapulisan sa nag-luntad nga pagpangluthang.