Duha patay bente-sais ka iban pa nga mga pasahero nasamaran sa nagluntad nga vehicular accident sa Banwa sang Nabas, Aklan
![Duha patay bente-sais ka iban pa nga mga pasahero nasamaran sa nagluntad nga vehicular accident sa Banwa sang Nabas, Aklan](https://radyobistado.com/wp-content/uploads/2023/01/victim-of-car-accident.jpg)
ILOILO CITY – Wala gid makasalbar sa pat-od nga kamatayon ang duha ka mga kabataan nga naga-edad tatlo kag nuebe anyos samtang nagkalasamaran naman ang bente sais (26) ka iban pa nga mga pasahero sang mini elf-truck matapos aksidente nga madisgrasya sa Brgy. Nagustan, Nabas, Aklan sang tinalikdan nga adlaw Enero 2, 2023 sang kaagahon.
Sandig sa interview sang Radyo Bistado kay Police Captain Moonyen De Joseph, ang hepe sang Nabas MPS, padulong kuntani ang grupo sa Malumpati Cold Spring sa Pandan Antique agud mag-outing apang sang pag-abot nila sa boarder sang Antique kag Aklan may ginapatigayon nga boarder control rason nga wala ini ginpalusot bangud may mga dala ini nga karne may kaantanan sa isyu sang ASF.
![](https://radyobistado.com/wp-content/uploads/2023/01/bfp.jpg)
Dugang pa ni De Joseph nga tungod sini nagdesisyon nalang magbalik kag didto nalang himuon ang outing sa Hurom-hurom, sa Brgy. Naserna, Nabas, Aklan apang sang pag-abot sa lugar kun sa diin natabo ang aksidente didto kag nag-over shoot ang drayber sa ginasundan sini nga mga salakyan apang aksidente nga nagtupa ang ruyda sang trak sa lubak-lubak nga porsyon sang kalsada rason nga lumupok ini kag disgrasya nga lumapaw sa kalsada kag tumabog gid ang iban nga mga pasahero sini.
Ginhingagaw pa dala sa ospital ang mga biktima apang sa malain nga palad ginbawi-an gid sang hulam nga kabuhi ang duha ka mga pasahero samtang ang bente-sais naman ka iban pa nga mga pasahero ang yara na sa maayo nga kondisyon.
Ginhunong naman sang Nabas MPS ang drayber sang trak kag nakatigayon nga makagwa tungod indi naman intiresado ang pamilya sang mga biktima nga magpasaka sang kaso batuk sa drayber.