Kandila nga na bayaan sa altar nag tuga sang sunog sa puluy-an sa Jaro

ILOILO CITY — Matapos ang pagsugalaw sa bag-ong tuig ginalauman sang kadam-an ang hilway nga pagsulod sang tuig 2023 nga malayo sa kasablagan apang ginkasubo sang pamilya Myra Buyco ang nag luntad sa ila puluy-an matapos gin tupok sang kalayo.

Ini ang nag luntad alas-10:00 sang gab-i, Domingo, Enero 1, 2023 sa Zone II, Barangay Tacas, Jaro.

Istorya ni Buyco, “naka balik na kami ya eh halin sa simbahan upod sang akon pamilya kag amo ang pag-sindi ka bata ko sang kandila sa atubang sang altar namon nga na hamtang sa ika-duha nga panalgan sang amon puluy-an.”

“Nalipatan na namon ang kandila kay ara na kami sa dalum tanan naga pahunay-hunay kay busog kami tanan kag wala na namon natalupangdan,”- dugang pa ni Buyco.

Ang 14 anyos nga bata nga babayi ni Buyco nga amo ang nag sindi sang kandila sang sila ang nakaabot na sa ila balay, mismo nga Buyco man ang una nga nakakita nga ibwal na ang kalayo sa ibabaw nila nga balay.

Gin hambalan pa ni Buyco ang iya bata nga “hoy ang kandila nga gin sindihan mo to” kag gin testingan pa nila nga tapna-on ang kalayo apang sila ang napaslawan bangud sa madasig ang paglapta sang kalayo dugang pa nga natukod sa light materials ang ila puluy-an.

Una nga tion nga mag sindi sa altar kanday Buyco matapos mag simba sa Alta Tierra kag dala ang kandila ni Candelaria. Pasalamat naman si Buyco nga wala man sang may nasamaran sa duha sini ka bata kag sa iya nga bana.

Gilayon naman nag responde ang mga Bureau of Fire Protection sang ciudad kag madasig naman nga tapna ang sunog kag wala naman nag lapta sa mga kaingod sini nga puluy-an.

Padayon pa ang imbestigasyon sang BFP kon pila ang kahalitan nga gintuga sang sunog.