Bayaw nga gin sita, gin buno patay sa Oton, Iloilo
ILOILO CITY — Wala na makahingagaw pa sa pagsugalaw sa bag-ong tuig ang isa ka lalaki nga ginbuno sang iya mismo bayaw, alas-8:30 sang gab-i, Disyembre 31, 2022 sa Barangay Botong, Oton, Iloilo.
Suno sa pahayag ni Police Senior Master Sergeant Tordesillas ang investigator on case sang Oton Municipal Police, nag guha sa iya puluy-an ang biktima nga si Rex Posadas, 43 anyos nga residente sang amo nga lugar kag nakita ang suspek nga si Adolfo Atoy Jr, 40 anyos, residente man sang nahambitan nga lugar kag lunsay ang mga ini yara na sa impluwensya sang makahulubog nga ilimnon.
Gin sita ni Posadas ang bayaw sini nga si Atoy kag wala na sang damo istorya gin lampusan ya sang botelya ang ulo ni Atoy, sang natalupangdan sini nga naga tagas na ang dugo sa iya ulo kag naga batyag na sang sakit, nag balos ini kay Posadas kag sila nga duha ang nag pukotay, sang nakita ni Atoy nga may taklos sang kutsilyo si Posadas nga may takus sang trese-ka-pulgada kag bangud naga ganar si Atoy nga mag timalus gin hunos sini ang kutsilyo kag gin dusak sa nawala nga kilid ni Posadas.
Gilayon naman nag responde ang Oton Search and Rescue Team (OSART) kag nahingagaw dala si Posadas sa Western Visayas Medical Center sa Mandurriao apang gin deklara ini nga dead-on-arrival alas-9:46 sang gabi sang amo man nga adlaw
Daan nga hiligut-anon ang ginatan-aw nga rason kon ngaa nag lab-otanay sila nga duha. Sadto paman permi na naga ginamo ang duha kon yara na sa impluwensya sang makahulubog nga ilimnon.
Dugang pa ni Tordesillas, mag bayaw malang si Posadas kag Atoy kag mag kaingud malang ini ang ila puluy-an. Disidido naman mag pasaka sang kaso ang iloy ni Posadas batok sa iya nga umagad.
Yara naman sa custodiya sang Oton Municipal Police Station si Atoy kag natalana pasakaan sang kaso nga Homicide bwas nga adlaw.
