Kapin 100,000 pesos nga balor sang gina suspetsahan shabu na kumpiska sa ginkasa nga drug buy-bust operation sang CDEU
ILOILO CITY — Dakop ang tatlo ka mga persona matapos gin hiwat ang drug buy-bust operation, alas-11:50 sang gab-i, Miyerkules, Pebrero 16, 2023 sa Barangay M.H Del Pilar, Jaro.
Sa pag panguna ni Police Lieutenant Colonel Antonio Benitez Jr, ang Officer-In-Charge sang City Drug Enforcement Unit (CDEU) kaupod ang team leader nga si Police Lieutenant Greg Matutino.
Pinaagi sa confidential agent gina alegar nga nabaklan ang subject person nga si Joval Ocana, 31 anyos nga residente sang Barangay Poblacion, Talisay City, Negros Occidental sang isa ka bulto nga gina patihan shabu gamit ang buy-bust money nga 20,000 pesos.
Na recover man sa posisyon ni Ocana ang isa ka black pouch nga may unod sang tatlo pa gid ka plastik nga may unod sang gina suspetsahan shabu lakip na ang buy-bust money, isa keypad nga cellphone kag drug paraphernalias.
Arestado man ang kaupod ni Ocana sa sulod sang balay nga sanday Arvin Guides, 46 anyos nga residente sang Zone 4, M.H Del Pilar kag si Paul Tubongbanwa, 32 anyos sang Barangay Cari Mayor, Leganes.
Ang nakumpiska nga mga druga ang naga bug-at sang 15 grams kag naga balor sang 102,000 pesos.
Si Ocana ang ginakabig sang kapulisan nga High Value Individual.
Yara naman sa kustudiya sang Jaro PNP ang mga arestado kag sila ang naga pangatubang sang kaso nga Republic Act 9165 ukon Comprehensive Dangerous Drugs Act of 2002.
