Lalaki ginbuno sa li-og sang iya man lang kaupod sa ilimnan sa Banwa sang Miag-ao, Iloilo
![ILOILO CITY - Ginhingagaw dala sa ospital ang 72 anyos nga tigulang matapos ginbuno sang iya abyan nga upod sa ilimnan, alas 4:30 ang takna sang hapon, kahapon nga adlaw Enero 11, 2023 sa Barangay Guibongan, Miag-ao, Iloilo.](https://radyobistado.com/wp-content/uploads/2023/01/miag-ao.jpg)
ILOILO CITY – Ginhingagaw dala sa ospital ang 72 anyos nga tigulang matapos ginbuno sang iya abyan nga upod sa ilimnan, alas 4:30 ang takna sang hapon, kahapon nga adlaw Enero 11, 2023 sa Barangay Guibongan, Miag-ao, Iloilo.
Ang biktima ang ginkilala kay Patricio Prado Y Morit, 72 anyos, kasado, isa ka mangunguma.
Samtang ang suspek naman ang ginkilala kay Benjamin Nofuente Y Quisqueno, 44 anyos, isa ka panday, lunsay residente sang nasambit nga lugar.
Suno sa imbestigasyon sang Miag-ao MPS, naga inom-imon ang mag-abyan kag tungod sang kahulugbon nagluntad ang hindi pag-intindihanay kag nagbina-isay kag didto nagkuha sang kutsilyo ang suspek kag ginbuno ang biktima sa li-og.
Dali-dali naman nga gindala ang biktima sa Miag-ao Rural Health Unit, agud madapatan sang nagaka-igo nga pagbulong.
Samtang ang suspek naman ang nakahunong na sa Miag-ao Municipal Police Station para sa nagaka-igo nga disposisyon.