Pagkawasak sang krus sa ibabaw sang lungon nga nahaya sa isa ka Barangay sa banwa sang Barotac Nuevo hindi tuga sang armas
ILOILO CITY – Wala sang kamatu-oran nga stray bullet halin armas luthang ukon pusil ang ginkabangdanan sang pagkaguba sang krus nga natungtong sa ibabaw sang lungon sang bangkay nga nahaya sa Zone 4, Brgy. Cabilauan, Barotac Nuevo, Iloilo sang tinalikdan nga adlaw sang Disyembre 31, 2022 samtang nagasaulog sang pagbulag sang bag-ong tuig.
Basis sa interview sang Radyo Bistado kay Police Major Regan Oreña, ang hepe sang Barotac Nuevo MPS ginklaro sini nga indi stray bullet ang rason sang pag ka wasak sang krus nga natungtong sa lungon kundi holen nga ginbala sa boga nga posible malapit lang sa lugar.
Dugang pa, ini man ang kabangdanan sang pag puhag sang iloy kag mga utod sang napatay lakip na ang mga pumuluyo sang lugar kun sa diin nahaya ang bangkay sa balay sang pamilya Torres.
Pahayag ni Elnora Torres, iloy sang nahaya nga bangkay, samtang naga trapo gid ini sang lungon sang iya bata sang hinali nga lumupok ang krus nga nagatung-tong sa ibabaw sang lungon kag bangud sang impak naasikan pa ang nawala nga porsyon sa idalum sang iya mata.
Ginalantaw man ni Police Major Regan Oreña nga mga bata nga nagapalupok sang boga samtang nagselebrar sang bag-ong tuig ang may kahimu-an.
