Iloilo City Public Safety and Transportation Office hugot nga gina patuman ang City wide campaign batok sa modified mufflers sa bug-os nga ciudad

ILOILO CITY — Mga magahod nga tambutso nga naga pinagusto nalang sang uwang matoud nga magahod kag maka isturbo sa pumuluyo nga naga katulog ukun sa mga pamatan-on nga naga tuon.

Ini ang ordinansa sang ciudad nga hugot nga gina patuman batok sa mga modified mufflers ukun sa tanan nga sahi sang tambutso nga naga tuga sang gahod.

Sa interview sang Radyo Bistado kay Iloilo City Public Safety and Transportation Management Office Head, Jeck Conlu, iya gin pahayag, “Citywide operation sa noisy muffler but of course indi man lang noisy pati na mga illegally modified mufflers, mga wala helmet, wala driver’s license, gina apprehend mana naton no. So, road part man ini sa aton road safety campaign, ah, to avoid man sa una sa pag disturbo sang aton mga pumuluyo kay may ordinansa kita sa ciudad, so that’s why nga gina conduct ini sia gab-i-gab-i ni siya no gina conduct ni naton citywide.”

Suno pa kay Conlu, “so far, maayo man ang dalagan sang operasyon, wala paman kita sang may na encounter gid nga naga resist ukun naga bais.”

Dugang pa ni Conlu, “possible gid nga may naga likaw no, but, ah, gina strategize man sang PNP naton ang aton nga area para kon ga likaw ka ambot silingon may yara ka gid nga ginatago nga violation ukun may yara gid violation, kita man naton kaina kag kita man nila nga may check point naga handa nga mag u-turn pero may mga personnel kita didto before and after sang aton checkpoint area.”

Mensahe naman ni Conlu sa mga naga likaw sa checkpoint kag sa may ma gahod nga tambutso, “sa aton nga motorista nga may ordinansa kita sa ciudad kag subong pag ka sugod sang January ga mandu ang aton alkalde sa ciudad nga strikto nga i-patuman ini para nga indi na kita mag disturbo sa aton pumuluyo, sa may oras paman, i-balik na naton sa original naton nga muffler sa original niya nga stock para indi ini siya mag lapas 115 decibels.”

Dugang pa ni Conlu, “and sa mga ga avoid nga mga motorista ah, indi na kita mag sagad ka likaw ka todo kay gaka tuna-an ina sang disgrasya, i-submit lang ninyo sa inspection kay kung wala kamu violation gina pa lakat man namon.”

Gamit ang sound meter nga gin bakal sang City Government ini ang itoun malapit sa tambutso agud mag takos kon ano ka gahod kag kung ang gahod sang tambutso ang naga dangat sa 115 pataas, ang driver sini ang maga multa sang mga penelidad ang maga sunod;

Ang una nga offense ₱1,000 kag barguhon ang lisensya sang driver; ika-duha ₱3,000 kag barguhon ang lisensya sang driver; ika-tatlo ₱5,000 kag hukason ang tambutso sang driver, barguhon ang lisensya kag pwedi ma priso sa tatlo-ka-bulan kag isa ka adlaw tubtub anum-ka-bulan sa desisyon sang korte.

Ang mga naga bayolar nga wala nag pundo sa check point ang maga tubang sa penelidad sang 1st kag 2nd offense nga may dugang sang ₱1,000.

Sang adlaw sang Miyerkules, Enero 4, 2023 quarenta na ka mga motorsiklo ang nag bayolar sa ordinansa sa distrito sang Jaro, lima naman sa Molo, ang mga naga bayolar, may yara sang magahod nga tambutso, wala sang helmet, wala sang lisensya kag wala sang OR/CR ang ila mga motor.