Kaso nga Homicide kag tatlo ka mga Frustrated Homicide ipasaka sa mag-utod nga suspek sa shooting incident sa Syudad sang Passi
ILOILO CITY – Ipasaka na subong nga adlaw ang kaso nga Homicide kag tatlo ka Frustrated Homicide batuk mag-utod nga sanday SSgt. Razel Palomar myembro sang Philippine Army nga nabasi sa 61st Infantry Batallon sa Banwa sang Miag-ao, Iloilo kag sang utod sini nga si Ronald Palomar, mga suspek sa pagpangluthang kag pagbuno sa Brgy. Aglalana, Passi City sadtong tinalikdan nga adlaw sang Sabado, Nobyembre 26, 2022 alas 12:20 Ang takna sang udto kadungan sang kapistahan sa nasambit nga Barangay.
Nahibaluan nga Isa (1) ang napatay nga ginkilala kay Greg Palomaria Sr. Samtang tatlo (3) naman ang nasamaran nga amo sanday Rolly Calsado, Mark Palomaria kag Greg Palomaria Jr sang magluntad ang kinagamo sa tunga sang mga ini matapos ginbangga-an ni Ronald Palomar ang tatlo nga nagasakay sa motorsiklo nga amo sanday Leomar Fernandez, Regie Lacson kag Greg Palomaria Jr nga manugpa-uli na kuntani sa ila balay sang ginbangga-an kag lampusan ang mga ini ni Ronald Palomar sang nabitbit nga tubo nga nagresulta sang pagpinukutay kag didto nakita ini ni SSgt. Razel nga nagresulta sang pagpangluthang sa nasambit nga Lugar gamit ang 9mm caliber pistol.
Suno sa interview sang Radyo BISTADO Kay PLt. Col. Denis Pamonag, Ang hepe sang Passi City Police Station, ginapreparar na nga i-file sa Korte ang Kaso nga Homicide kag tatlo ka Frustrated Homicide batuk sa mag-utod nga sanday Ronald kag Razel.
Dugang pa ni PLt. Col. Pamonag nag-umpisa ang hindi maayo nga pagtamdanay sang magtimbang nga pamilya sang gin-aligar nga ginsapote sang pila ka katapo sang mga Palomaria ang utod sang mga Palomar sa sulod sang baylihan.
Sa karun yara na prisohan ang mga suspek samtang duha sa mga biktima ang padayon pa nga ginabulong sa Ospital samtang si Mark Palomaria nga Isa man sa mga biktima ang out patient na.
