Porky-Porky Festival sa Banwa sang Leganes, Iloilo nangin madinalag-on
ILOILO CITY – Sa kabug-osan nangin madinalag-on Ang ginhiwat nga Porky -Porky Festival kadungan sang ila opening of lights sa Banwa sang Leganes kahapon nga adlaw sa Una nga adlaw sang Desyembre subong nga tuig 2022.
Gin-umpisahan ang selebrasyon pina-agi sa matahom nga parada sang mga lechon kaupod ang mga Barangay Officials sa tagsa ka mga kabarangayan sang nasambit nga banwa.
Nahibalu-an nga 36 ka mga baboy ang ginpang-ihaw agud himuon nga lechon halin sa nagakalain-lain nga mga kabarangayan agud ibaligya kag ipatilaw sa mga nagtambong.
Samtang madamo naman ang nadismaya nga mga nagtambong sa kahiwatan tungod ginkulang ang mga ginpreparar nga lechon kay temprano pa ini na-ubos nagpangayo naman sang pasaylo ang lokal nga pamunu-an sang banwa sang Leganes may kaantanan sa amo nga problema.
Ini ang nangin pama-agi sang lokal nga pamunu-an sang nasambit nga banwa agud makabulig sa mga hog farmers nga naapektuhan sang ASF ukon African Swine Fever tungod kay ang Banwa sang Leganes Ang napaidalum sa red zone ukon affected zone sang nasambit nga balati-an.
